Skribentarkiv: Arild Torvund Olsen

Mats Eldøen og Sindre Goksøyr: Viss eg hadde hale

Korleis ville det vore å ha øyre som ein elefant? Eller å ha hale som ein apekatt? Eller å vera tvikjønna som ein brunsnigel? Slike fabuleringar er utgangspunktet for denne leikne og originale faktaboka for born. Eldøen leikar seg med tanken på kva som kunne vore mogleg dersom han hadde hatt ulike eigenskapar som dyr har, og so visualiserer Goksøyr det på sprelsk og kroppsoverskridande vis. «Viss eg hadde hale som ein apekatt, kunne eg tørka meg i rumpa medan eg las teikneseriar på do», kan me lesa. Etterpå får me vita kva apekattar nyttar halen sin til.

Les meir

Marianne Gretteberg Engedal: Pølsetjuven

Familien til Kjell er tjuvar, men Kjell har ikkje lyst til å stela ting frå folk. Det einaste han stel, er ting som ingen eig lenger. «Å plukke søppel er ikkje å stele, det er å rydde. Tjuvar ryddar då ikkje», seier mor hans oppgjeven. Det heile toppar seg når venen til Kjell, Pølse-Per, dreg på ferie. Då krev familien at Kjell skal vera med og stela frå huset til pølsefamilien. Men må Kjell vera ein tjuv, berre av di familien hans er tjuvar?

Les meir

Veronika Erstad og Ella K. Okstad: Korleis bli kvitt ei veslesøster

Guri får ei veslesyster, men det har ho ikkje lyst på. Livet var langt enklare før babyen kom og stal all merksemda til mora med skrik og skrål. Guri har rett og slett lyst til å få bort problemet, og ho lagar difor ei liste med ulike måtar ho kan kvitta seg med veslesystera si. Men går det verkeleg å spyla ein baby ned i do? Eller er det kan henda slik at det kan vera bra å vera storesyster, trass alt?
Les meir

Øystein Runde: Berserk

I 2009 kom Øystein Runde med teikneserien Soga om Olav Sleggja, og etter ni års venting kjem no endeleg bok to i serien. Denne gongen byrjar soga med at Olav Sleggja går i land, hardt skadd, med eit spedbarn på skuldrene og med tarmane halvvegs hengande ut frå eit ope sår i magen. «Denne dagen vert lang. Eller kort», slår han fast på lakonisk vis. Deretter vandrar han rett inn i ein konflikt mellom tre ulike gjengar av berserkar, ein konflikt som kjem til å få eit blodig utfall.

På same vis som i den fyrste boka kan Berserk by på ein fin kombinasjon av ekstremvald, poesi, skandinavisk soge, norrøn mytologi og referansar til alt frå manga til barnebøker. Og boka gjev oss lesarar eit rikt råmateriale til å filosofera over ting som religion, vitskap, menneskeverd og andre store spørsmål. Men mest av alt er det her ei drivande god og spanande forteljing, breiddfull av slagkraftige replikkar.

Anders Totland: Den norske slavehandelen

Illustrert av Kristian Krogh-Sørensen

Den dansk-norske medverknaden er ofte underkommunisert når norske born skal læra om slavehandelen. I den nye faktaboka si gjev Anders Totland ei levande skildring av kvardagen til nordmennene som dreiv med slavehandel. Her får me møta alt frå sjømannen Ole Nicolaysen, som arbeidde og døydde under harde kår på slaveskipet Fredensborg, til norske guvernørar som dreiv slavefort på den afrikanske vestkysten. Totland skriv lett og levande, og innimellom får me faktaboksar som gjev ekstra informasjon om dei ulike emna.

Boka avsluttar med å syna at slavehandel, jamvel om det no er i andre former, framleis er noko som føregår. I siste kapittelet får me nemleg fylgja Irena, som vart halden som slave og tvungen til prostitusjon i Oslo i to år før ho greidde å rømma attende til Litauen.
Les meir

Asbjørn Rydland: Draumsende

Asbjørn Rydland er no ute med Draumsende, andre bok i fantasy-serien Vegandi. Bok nummer ein, Galderstjerna, vart vinnaren då norske ungdomar i 2017 skulle kåra den beste ungdomsboka, og Draumsende er minst like god som fyrsteboka. Tempoet er høgt, språket er godt, handlinga er spanande og du veit aldri kva som kjem kring neste sving.

Eirik, Khalid og Maria freistar finna ut meir om bakgrunnen for hendingane i fyrsteboka, men støyter på nye spørsmål og problem som gjer at dei endå ein gong må reisa til Ingenmannsland. Der får dei læra meir om vegandi, galdrar og kampen mot anzilane. Men kven var det eigenleg som gav krefter til Eirik? Og kvifor får han brått brutale syn og draumar? Kan andre vegandi lita på han? Og kva hender når anzilane allierer seg med ei gruppe brutale nynazistar?

Mette Karlsvik og Tord Torpe: Kjøt

Teikneserien Kjøt går i hovudsak føre seg i skogen utanfor Oslo, der me i ein kort periode fylgjer ein ung, kvinneleg student. Ho tek bussen til endehaldeplassen for å utforska området, men rotar seg bort og famlar inn i eit møte med det ukjende. Teksten til Karlsvik og teikningane til Torpe vekslar mellom store liner og ørsmå detaljar. Dei skildrar ei stemning som ligg ein stad mellom draum og røynd, og det heile går føre seg i grensene mellom trygt og utrygt, natt og dag, ljos og mørker og storby og villmark.

Les meir

Anja Dahle Øverbye: Bergen

I den nye teikneserieromanen til Anja Dahle Øverbye møter me Maria. Ho er fersk student i Bergen, slit med depresjon og bruker litt for mykje tid på pub og litt for lite tid på lesesalen.

Trass i kjærast og gode veninner slit Maria med einsemd, og ho finn ikkje heilt plassen sin i vaksenlivet med arbeid og studering. Det heile er skildra med ein nydeleg blyantstrek som gjer at miljøet i forteljinga verkeleg kjem til liv.

Ida Eva Neverdahl: Jojo

Den fargerike, humoristiske og absurde teikneserien Jojo går fast i Norsk Barneblad. Her møter du robot-einhyrningar, ånder i brusboksar, ninjamødrer, søte dyr, fiskeprinsesser og anna som Jojo støyter på i den magiske kvardagen sin. No er endeleg seriane om Jojo samla i bokform, med ei heilt nyskriven rammeforteljing som opnar og avsluttar boka.

Streken til Neverdahl er leiken og levande, og forteljingane er slik at du aldri veit heilt kvar dei kjem til å enda opp. Når boka i tillegg har fått eit lekkert omslag (plusspoeng til Samlaget for smakfull bruk av glitterbokstavar), er det ikkje rart at niåringen min var særs snøgg med å plukka opp og lesa boka med det same me fekk henne i hus.

Les meir

Linda Klakken: Dumme, dumme hjarte

I byrjinga av boka tykkjer Klara at kyssing er ekkelt. Ho grøssar av synet av Romeo som kyssar Julie på teateret. Æsj! Spytt og greier! Men so hender det, slik det gjerne gjer i den alderen, noko som gjer at ho sjølv får lyst til å kyssa: Det byrjar ei ny jente i klassen. Marie heiter ho, og ho er det finaste Klara har sett. Ho dansar som ei gudinne og ser heilt nydeleg ut. Klara vert hovudstups forelska.

Klakken tematiserer ikkje at det er ei jente som er forelska i ei jente, men får fram det universelle i situasjonen. Kjærleik er kjærleik, og forelsking er aldri enkelt. Korleis skal du få sagt det du du føler til den du er forelska i? Tenk om den personen ikkje er interessert? Det her er kjensler alle kan kjenna seg att i, same om dei er forelska i ein gut eller ei jente.

Les meir