Kategoriarkiv: 6–9

Sjå boklister for aldersgruppa: Boklister 6–9 år

Rakel Helmsdal, Kalle Güettler og Áslaug Jónsdóttir: Monsterbesøk og Monsterknipe

Omsetjing: Tove Bakke

Dei to nye bøkene om Veslemonster, Storemonster og den nye venen Raggmonster er parallelle historier som kan lesast kvar for seg.

I Monsterbesøk vil Storemonster leike med Veslemonster. Men Veslemonster kan ikkje, for Raggmonster er på besøk.

Veslemonster og eg skal ut og fiske, det gjer vi alltid om laurdagen.

– Kjem du, då? spør eg.
– Kor hen, svarer Veslemonster.
– Ut og fiskar, vel! seier eg.
– Nei, seier Veslemonster.
– Eg har ikkje tid. Ha det!

Storemonster tykkjer ikkje det er noko moro å leike åleine. Skal tru om dei kan leike saman alle tre? Monsterbesøk er ei bok om kor vanskeleg det er å vere tre.
Les meir

Mats Eldøen og Sindre Goksøyr: Viss eg hadde hale

Korleis ville det vore å ha øyre som ein elefant? Eller å ha hale som ein apekatt? Eller å vera tvikjønna som ein brunsnigel? Slike fabuleringar er utgangspunktet for denne leikne og originale faktaboka for born. Eldøen leikar seg med tanken på kva som kunne vore mogleg dersom han hadde hatt ulike eigenskapar som dyr har, og so visualiserer Goksøyr det på sprelsk og kroppsoverskridande vis. «Viss eg hadde hale som ein apekatt, kunne eg tørka meg i rumpa medan eg las teikneseriar på do», kan me lesa. Etterpå får me vita kva apekattar nyttar halen sin til.

Les meir

Marianne Gretteberg Engedal: Pølsetjuven

Familien til Kjell er tjuvar, men Kjell har ikkje lyst til å stela ting frå folk. Det einaste han stel, er ting som ingen eig lenger. «Å plukke søppel er ikkje å stele, det er å rydde. Tjuvar ryddar då ikkje», seier mor hans oppgjeven. Det heile toppar seg når venen til Kjell, Pølse-Per, dreg på ferie. Då krev familien at Kjell skal vera med og stela frå huset til pølsefamilien. Men må Kjell vera ein tjuv, berre av di familien hans er tjuvar?

Les meir

Anna R. Folkestad: Ulla

Ulla vil vere med i flokken til Ronny, Albert og Ullbert, men dei seier at alle som er med i ein flokk, må vere veldig flinke til noko.

Ulla er veldig flink til å gøyme seg, og ho tenkjer at når ho har bevist det, får ho vere med i flokken, ho også. Det er berre det at dei andre ikkje kjem og leitar etter henne. Dessutan er Ulla så flink til å gøyme seg at ho sjølv må leite etter vegen tilbake. Ho møter ein heil gjeng med artige og fine dyr som vil hjelpe til. Saman med dei nye vennene er verken elva, steinraset eller den sovande bjørnen noko problem.

Ulla er ei fin og hjartevarm bok om det å vere ein del av ein flokk.

Les meir

Vegard Markhus: Det runde problemet

Robert kjenner på seg at alt ikkje er slik som det skal vere. Alt er berre rot. Ikkje høyrer han fuglesongen eller vekkarklokka. Ikkje ser han rotet rundt seg eller blåfargen på himmelen. Det er noko viktig som manglar, han kjem berre ikkje på kva det er. Då han snublar i ei rund greie som ligg på golvet, skjønar Robert at han har eit problem. Men kva kan den runde greia brukast til, eigentleg?

Som i Timothy mister seg sjølv er det eit nokså absurd problem som oppstår i Det runde problemet: Å miste kroppsdelar er noko som vanlegvis er nokså dramatisk og kritisk, men i bøkene til Vegard Markhus er denne tematikken både humoristisk og uproblematisk. Den enkle og naivistiske streken forsterkar humoren i bøkene og gjer at temaet ikkje vert makabert og usmakleg. Det runde problemet eignar seg for born frå 5 år og oppover.

Annika Lundholm Moberg: Raketten

Parva har superfantasi og kjem stadig på nye historier å fortelje eller idéar til prosjekt som kan setjast ut i livet. Det er berre eitt problem: Ho har lyst til å vere venn med Bea, og Bea likar ikkje slikt. Parva har skikkeleg lyst til at Bea skal like henne, og finn ut at ho vil slutte med alt det som Bea synest er teit. Ho vil ikkje tenkje ut nye historier eller byggje noko som helst lenger. Til slutt blir ho nesten usynleg, utan at det gjer at Bea blir særleg meir interessert i henne. Så kjem det ei ny jente i klassen, Rubi. Ho har også livleg fantasi og føreslår at dei skal byggje ein rakett i lag i skuleprosjektet. Parva har lyst til å bli med, men kva vil Bea seie? Og skal ho bry seg om det?

Bente Bratlund og Rui Tenreiro: Kvar er Lurven?

Tore har ein firbeint bestevenn, Lurven. Han er slett ingen rasehund, men for Tore er han den beste og mest verdifulle hunden i verda. Ein kveld skal Tore og kusina Britt på teaterframsyning på skulen, og Lurven følgjer etter dei. Dei prøver å seie til hunden at han må snu og gå heim, men ingenting nyttar før Britt snakkar til han med skikkeleg streng stemme. Då snur Lurven og tuslar heimover. Trur dei. Men Lurven kjem ikkje heim den kvelden, og heller ikkje neste morgon. Tore er redd og lei seg. Kvar kan bestevennen vere?

Kvar er Lurven? er ei lettlesen bok som har akkurat nok spenning til at ein ikkje vil leggje boka frå seg. Det er lite tekst på kvart oppslag, og det er eit avgrensa persongalleri å halde orden på. I tillegg til å handle om vennskap på tvers av alder og mellom dyr og menneske, inneheld boka livsvisdomsord som «Bestemor seier at å gråte er like sunt som gulrøter».

Pia Strømstad og Ella K. Okstad: Heksa Galla

Leseland, nivå fire

Heksa Galla er ei forrykande bok om ei heks utanom det vanlege. Ho hevdar til dømes at ho er fryktlaus, men er eigentleg redd mange ting, som vatn, syngjande monster, tannbørsten sin og mørkeret. Men mest av alt er Galla redd born. Dei får henne til å gløyme trolldomskunstane og trylleformlane sine, og ho blir sitjande under bordet med fingrane i øyra og vente til borna har gått forbi huset hennar. Derfor finn ho ut at ho må lage ein plan for å bli kvitt desse små menneska: Ho vil koke dei i badekaret sitt. Ho får hjelp av den gode naboen Torvald, og går i gang.

Det høyrest kanskje nifst ut, men boka er meir humoristisk enn skummel, og ho er full av ekle og fråstøytande detaljar, som ormeblod og flugemjøl. God lesing!

Nancy Øvrehus og Anna Fiske: Randi bur i koffert

Leseland, nivå tre

Har du høyrt om nokon som bur i koffert? Kanskje nokon som reiser mykje? Tanta til Randi bur i koffert, seier mor, og det får Randi også lyst til å prøve. Ho leitar opp den store, brune trillekofferten, dreg han ut i gangen og leitar fram det ho vil ha med. Så sleper ho med seg kofferten til busshaldeplassen. Vel framme er ho så sliten at ho kryp oppi kofferten for å kvile litt. Det blir ikkje heilt som ho hadde tenkt seg.

Astri Sudmann: Syng og leik i lag

Astri Sudmann har samla 65 songleikar til bruk i barnehage og skule, saman med ungdommar, vaksne og på aldersheimen. Nokre av tekstane er på dialekt, andre er på nynorsk eller bokmål. Sudmann er utdanna lærar, reiser rundt med Den kulturelle skulesekken og er lærar i dans på Ole Bull Akademiet. I føre- og etterordet skriv ho at ho brenn for den livsviktige leiken. I songleiken kan alle vere med. Her er det ingen konkurranse eller krav til prestasjonar. Ein kan leike ute eller inne, og treng ikkje noko utstyr for å kome i gang.

Les meir