Kategoriarkiv: krim

Lars Mæhle: Landet under isen & Dødeboka

Mange etterlyser nynorske fantasy-bøker for ungdomar. Ein fin stad å byrja kan vera romanen Landet under isen av Lars Mæhle. I boka møter me Leo Rubin, som oppdagar at han er den utvalde som må frigjera verda frå grepet til den svarte munken.

Boka vann litteraturprisen til Kulturdepartementet for beste barne- og ungdomsbok 2009, og juryen skriv:

«En ambisiøs roman med god driv og mange plan. Boka kombinerer fantasy- og krimsjangeren, inneholder et spennende filosofisk aspekt og diskuterer religiøse og politiske tema. Det lokale, det historiske og det universelle forenes, og dagsaktuelle spørsmål settes inn i en større sammenheng.»

Les meir

Per Jan Ingebrigtsen: Offer

Offer er ein spennande og dagsaktuell kriminalroman for ungdom. Fatima og besteveninna Silje er begge 18 år og går i same klasse på vidaregåande på Stord. Fatima og familien hennar kjem frå Somalia. Ein dag er Fatima borte frå skolen. Ho skal giftast bort til ein mann som er over 40 og har to koner frå før. Men Fatima veit at ho ikkje vil bestå jomfrudomstesten, ho har jo vore saman med ein norsk gut. Fram til undersøkinga må Fatima vere på rommet sitt. Ho får ein sms frå Silje som seier at dei må møtast, og Fatima kjem seg ut vindauget om natta. Men det er ikkje Silje som møter ho.

Silje tar kontakt med Salomon Sander, ein drikkfeldig eldre kar av taterslekt, og ber han hjelpe seg med å finne Fatima. Dei klatrar inn på rommet hennar, og oppdagar at senga er varm. Mohammed, bror til Fatima, oppdagar dei, men veit ikkje kvar ho er. Dei må kontakte politiet, men før det får Silje Mohammed til å love at Fatima ikkje skal sendast til Somalia.
Les meir

Überviking

UbervikingFrå 16 år og oppover

Redaktør: Are Edvardsen

Det vesle forlaget Überpress er no ute med den tredje teikneserieantologien sin. Denne gongen er temaet vikingar, og seksten norske serieskaparar har tolka temaet på kvart sitt vis. Her er alt frå blodig alvor til reinspikka tull og tøys. I tillegg til vikingar av det tradisjonelle slaget, møter me til dømes lemen-vikingar, privatdetektiv-vikingar og vikingar som rotar seg inn i japansk populærkultur.

Les meir

Lars Mæhle: Den mørke porten

Ein mann blir drepen på brutalt vis i ein kyrkjeruin, same stad som psykologen Karsten Scheel blei funnen myrda fem år tilbake. Ina Grieg, Scheels kollega og hemmelege elskar, blir inkludert i etterforskingsteamet. Kjensla av at ho er med i teamet på nåde, gjer at Ina Grieg finn uortodokse metodar for å få etterforskinga framover. Hennar gamle venn og mentor, den pensjonerte psykologprofessoren Trygve Winther, viser seg å bli til stor hjelp. Snart blir det klart at dei står ovafor ein seriedrapsmann besett av hemn. Og Ina må kjempe mot fleire demonar i jakta på fienden, ikkje minst sine eigne.

Terje Torkildsen: Dystopia III

I bok nummer tre i serien Dystopia møter me på ny dei fire ungdomane som er på flukt gjennom eit Europa råka av naturkatastrofar. Dei fire er no komne til Belgia, der dei søkjer ly på slottet til markien av Moulindam. Uvêr gjer at dei vert isolerte på slottet, og når kokka på slottet vert drepen, er det duka for mordgåter og dramatikk. Tempoet er høgt, boka er spanande, og til liks med dei to fyrste bøkene i serien vil Dystopia III vera eit godt val for spaningshungrige og utolmodige lesarar i alderen 14–17 år.

Boka kan fint lesast utan å ha lese dei to fyrste bøkene i serien.

Ingelin Røssland: Engleslakt

Engleslakt er tredje boka i Ingelin Røsslands spanande og populære serie om  detektivheltinna Engel Winge. Og det vert ikkje noko mindre nervepirrande denne gongen, om du trudde det!

Røssland (f. 1976) let seg ofte inspirere av miljø som ho sjølv har vanka i. Ho tek utgangspunkt i eit representativt, lite bygdesamfunn ein stad på Vestlandet, der ho let Engel ha den same jobben som ho sjølv ein gong hadde, som journalist i lokalavisa. I dei to første bøkene møtte lesaren ei rappkjefta og insisterande jente som var viljug til å ta drastiske sjansar for å kome til botns i dei sakene ho vart involvert i. Første boka, Englefjes handla både om menneskehandel, politisk korrupsjon og miljøvern. I oppfølgjaren Englejakt får lesaren servert mystiske forsvinningar, narkohandel og overgrep. På t-skjorta til hovudpersonen stod det «My name is Queen of Fucking Everything». Og det seier vel ein del? Her er det inga kjære mor! Les meir

Ingelin Røssland: Englefjes og Englejakt

Det Norske Samlaget

Fleire forskarar, blant anna Nina Méd, viste på starten av 2000-talet at det var langt mellom dei handlekraftige jentene i norsk barne- og ungdomslitteratur. Heltinnene var med andre ord etterspurd mangelvare. I 2008 svara Ingelin Røssland med å setje Engel Winge på mopeden og la ho suse inn i den nynorske bokheimen.
Med bøkene Englefjes og Englejakt (2009) har Røssland gitt norsk ungdom ei storkjefta og dumdristig heltinne som stikk nasen sin i andre sine saker både seint og tidleg. Engel Winge er sommarvikar i bladet Tysnes, men ho nøyer seg ikkje med å skrive om det lokale fotballaget eller lage koselege sommarintervju, ho vil drive med gravande journalistikk. Det er sjølvsagt ikkje alt ho grev fram som folk vil ha på trykk, og ho risikerer både liv og helse i begge bøker, men Engel let seg ikkje skremme. Les meir

Magnhild Bruheim: På flukt

Mannen som stod i den vesle entreen, la ikkje merke til at ho kom ut før det var for seint. For seint til å skjule det han hadde i hendene. Ho såg, og han visste at ho hadde sett. Bente kjende redselen banke, og beina skalv under henne da ho fann tilbake til sofaen. Ho hadde aldri sett eit skytevåpen før.

Magnhild Bruheim er ute med ei ny kriminalforteljing om besteveninnene Kami og Bente. På flukt er den tredje boka i den populære serien, dei to første er Ny melding og Venneringen. Bruheim skriv spennande og aktuelt om ungdom som hamnar i farlege situasjonar. Dette likar lesarane!
Les meir

Magnhild Bruheim: Ny melding

Ny meldingKrim er ein populær sjanger. Stramme rammer, spennande historier, alltid ei løysing, eitt rett svar. Magnhild Bruheim er ein etablert kriminalforfattar, men dette er den første boka der ho har ungdom som målgruppe. Med rutinert grep om sjangeren skaper ho ei skummel og skremmande forteljing med mobiltelefonen i sentrum for dramatikken.
Les meir