Kategoriarkiv: lydbøker

Rune Belsvik og Kari Stai: Kjendisen

kjendisenAlle dei vaksne i Tullevik gler seg til at den populære kjendisen skal komma til bygda og synga for dei. Men det er berre Mo som veit at kjendisen har ramla ned i ei bratt grop i skogen og verken har mobil eller nokon til å hjelpa seg. Dette skal han visa til Unn, som han er så innmari forelska i!

Kjendisen er Rune Belsvik på sitt beste. Umiskjenneleg, spennande, varm og hylande morosam.

Boka finst også som lydbok.

Carl Frode Tiller: Innsirkling 1–3

Trilogien Innsirkling har fått rosande merksemd og mange utmerkingar. I desse intenst urolege bøkene handlar det om unge menneske som alltid er i ei desperat og djup psykologisk krise.

Innsirkling 1 handlar primært om dei tre forteljarane Jon, Arvid og Silje – og til ei viss grad om den minnelause David, som er avbilda på smussomslaget på romanen. Lesaren får eit klaustrofobisk innblikk inn i den håplause kvardagen deira, og vi får kjenne på kor vanskeleg det kan vere å vekse opp i eit konformt småbymiljø når ein har eigne tankar både om kven ein er og kven ein vil bli. Les meir

Brynjulf Jung Tjønn: Så vakker du er

Tjonn_SaVakkerDuEr12 år og oppover

Korleis smakte det? spurte han.

Kysset?

Ja.

Eg veit ikkje.

Jo, det veit du, Henrik.

Henrik veit ikkje korleis det smakar når Kjersti kysser han. Han har aldri kyssa henne. Men til Simon, den kreftsjuke onkelen sin, seier han at han har gjort det. Så han må gjere det. Før det er for seint, medan han endå har sjansen til å fortelje onkel Simon korleis det smakar. Før han døyr.

Les meir

Are Kalvø: Ny grunnlov

Den norske grunnlova blei laga for nesten to hundre år sidan av ein gjeng ureinslige menn på seminar på Eidsvoll. Are Kalvø meinte han måtte kunne gjere ein betre jobb, og reiste ut i landet for å lage ei ny grunnlov, som bygger på det folk i dag meiner.

Resultatet blei ei ny og sjølvsagt mykje betre grunnlov, men òg ein tv-serie som dokumenterer arbeidet, som blir vist på NRK i år med tittelen Riksforsamlinga.

Boka inneheld den nye grunnlova, historia om korleis grunnlova blei til, men òg mange ulike slags forsøk – nokre av dei direkte tøvete – på å finne ut kva folk i dag eigentlig meiner om til dømes likskap, demokrati, monarki, religion og ytringsfridom.

Boka finst også som lydbok.

Les meir

Agnes Ravatn: Fugletribunalet

TV-programleiaren Allis Hagtorn forlèt mann og jobb etter ei offentleg sexskandale og byrjar som hushjelp for Sigurd Bagge, ein mann i førtiåra. Allis går frå å vere på alles lepper til å bli heilt anonym. Til å begynne med omfamnar Allis den nye situasjonen, men det tar ikkje lang tid før fascinasjonen for Sigurd Bagge dominerer livet hennar. Etter kvart som dei kjem nærare kvarandre, blir det avgjerande spørsmålet: Kven er Sigurd Bagge, og kva vil han med Allis?

I eit avsidesliggande hus ved havet har to menneske søkt eksil. Begge har ein løyndom og eit ønske om å sone. Den eine ber på skam, den andre skuld. Kva må til for å kunne starte på ny?

Boka finst også som lydbok

Ragnfrid Trohaug: Vi vil ha hund!

Mange unge lesarar ønskjer å lese om dyr. Denne boka handlar om Jenny og Ole som er tvillingar og bestevener. Dei vil så veldig gjerne ha ein hund, men mamma og pappa er vanskelege å overtale. Kva må ein eigentleg gjere for å vise at ein kan ta ansvar for ein hund?

Jenny og Ole tenkjer å tjuvlåne ein hund og legg ein «vasstett» plan. Dette må gå bra … men kva skjer når dei skjønar at dei har tjuvlånt ein premiehund?

Boka har overraskande element og er spennande. Det er ei lettlesen bok, i Leseløve-serien til Cappelen Damm, med korte linjer og stor skrift. Boka passar for born frå ca. 7 år som kan få oppleve gleda ved å lese ei heil bok sjølv.

Boka finst også som lydbok.

Lars Mæhle: Fuck Off I Love You

«Vi var fem gutar.
Ein skulle miste kjærasten. Ein skulle skamslå ein annan. Ein skulle dø.»

Slik begynner boka Fuck Off I Love You av Lars Mæhle. Det handlar om Vemund, som er 16 år. No står han med ein lighter i ein knusktørr åker. Han kjenner seg pressa av leiaren av kompisgjengen, Two-Face, til å tenne på. Han har sklidd heilt ut, og det er like før han gjer seg ansvarleg i hatkriminalitet.

Må han gjere som han blir fortalt av kompisane, eller kan han ta eit fritt val og velje ein annan veg? Mæhle skriv godt, med eit flytande og lett språk, men nærmar seg samstundes vanskelege og kompliserte spørsmål om mennesket sin reelle fridom til å ta eigne val.
Les meir

Atle Hansen: Amanda sin medisin

Teikna av Inger Lise Belsvik

Amanda sin medisin er ei bok i Leseløve-serien. Bøkene i denne serien har korte linjer og stor skrift, og er lette å lese. Dei passar godt for barn frå sju år som kan lese sjølve. Boka kan passe godt for å lese på eiga hand, men ho har handling, driv og språklege kvalitetar som gjer henne eigna for høgtlesing òg.

Denne boka, Amanda sin medisin, har eit tema som barn kan kjenne seg igjen i. Det handlar om å ikkje få leike med dei ein helst vil leike med. Og det handlar om å ha ein ven som berre finst i fantasien. Temaet vennskap er viktig for barn, og eg tenker at det er avgjerande at forfattar og illustratør ikkje tek for lett på det og tullar det bort, eller at dei skriv så realistisk og problematiserande at det blir humørlaust. Eg synest dei klarer denne balansegangen. Språket er rytmisk og rikt på dialog, og illustrasjonane eit rikt visuelt univers, der personane trer tydeleg fram.

Les meir

Bjørn Sortland: 12 ting som må gjerast rett før verda går under

12_tingLydbok lesen av Kjersti Botn Sandal

Therese er tretten år og lengtar. Lengtar etter å kjenne noko skikkeleg. Å ha kjærleikssorg eller noko slikt. Som Billie Holiday, som syng om at ho reiser utan bagasje fordi kjærasten har gått frå henne. Etter at mamma fortalde om den store og livsomsnuande «beslutninga» til ho og pappa, tenkjer Therese at alt er hulter til bulter og omvendt. Ingenting kan nokosinne verte slik som det har vore. Dessutan kjem verda snart til å gå under, tenkjer ho. Der er nok av teikn på at det kan kome til å skje.

Les meir

Rune Belsvik: Forteljingar om Jolver

JolverIllustrert av Kari Stai.

På framsida av Forteljingar om Jolver ser vi ikkje eit bilete av Jolver. Kari Stai har i staden teikna spegelbiletet til Jolver. Han ser seg sjølv i ein sølepytt, og det einaste lesaren kan sjå av sjølve guten, er føtene hans. Slik er det inne i boka også. Jolver speglar seg i dei små og kvardagslege hendingane rundt seg, medan han prøver å finne ut kven han er og kven han kan bli. Forteljingar om Jolver er noko så sjeldan som ei eksistensiell barnebok, ei enkel bok om store tema: sjølvstende og morsbinding, døden, identitet, fiksjon og røynd, forandringar og kommunikasjon. Les meir