Ingelin Røssland: OMG

Ingelin Røssland skildrar ungdomskulturen, tankar, språk og hendingar rått og sårbart. I OMG møter vi Maria på 15 år. Livet handlar om å bryte grenser og gjere opprør. Å feste, status i flokken, hærverk, å erobre unge menn med raske bilar og å skaffe seg seksuell røynsle. Maria identifiserer seg med mørk råskap og viser ikkje nåde til nokon. Heller ikkje mor si, besteveninna Julie, eller mormor, som utgjer hennar nærmaste etter at ein kjær morfar gjekk bort.

Ein fest går over styr, og Maria blir skyssa heim i politibil. Dette får begeret til å flyte over for den fortvila og slitne mor hennar. Anten ringer ho barnevernet, eller så tek Maria ei veke hjå den strenge mormora i Tysnes. Utan mobil og Internett.

Les meir

Rotraut Susanne Berner: Leit og finn i Vrimleby

Vinter – vår – sommar – haust

Klassikarane med dei detaljrike teikningane av alt som skjer i Vrimleby, er tilbake. No i eit hendig format for lesing på fanget eller i små grupper. Teikningane er dei same som før, men nytt i denne utgåva er eit felt nedst på oppslaga med nokre av teikningane og orda attmed. På denne måten vert det enklare å snakke om teikningane og å bruke nye og andre ord enn ein kanskje kjem på sjølv. Bøkene har kartongsider og kan godt lesast for, og brukast av, små born. Med den nye ordbokdelen nedst på sida er bøkene aktuelle også for større born og vaksne som skal lære norsk.

Les meir

Magnhild Bruheim: Avlyst på grunn av sorg

Magnhild Bruheim er ein av dei fremste som skriv for ungdom på nynorsk. I Avlyst på grunn av sorg blir kjærleikssorg, svik, vennskap, omsorgssvikt og livsvilje tematisert. Vi møter Eline ved oppstart av vidaregåande skule. Livet smiler. Sommaren har vore innhaldsrik, ho er saman med ein flott gut som heiter Jonas, ho har gode venner, og ho skal endeleg starte på musikk, drama og danselinja. Ho har også stor tru på at ho kan få hovudrolla i musikkspelet som skal setjast opp ved skulen!

Les meir

Atle Berge og Henning Lystad: Robot-Birk

Vi kjenner att gutane frå dei første bøkene om Barcelona-gjengen. Denne forteljinga startar med eit dramatisk fall som endar med sjukehusopphald for Birk. Både han og resten av fotballaget synest det er heilt forferdeleg. Snart er det nemleg årets viktigaste kamp. Kven skal no rope «skyt» når Moa skal skyte? Det brukar Birk alltid å gjere, og no ligg han på sjukehus og kan verken rope eller spele fotball. Men kanskje dei kan låne roboten, som er auga og øyra til Birk, og som rektor brukar i klasserommet medan Birk er for sjuk til å kunne følgje undervisinga på skulen? Klarer dei å få lånt roboten utan at nokon merkar noko, og klarer dei å vinne kampen?

Leseland, nivå tre

Bok på 1-2-3: Jakob og Neikob og det tomme rommet

Jakob og Neikob er bestevenner og bur i lag i eit høgt hus. Jakob bur i første etasje, og Neikob bur i andre. Men på loftet er det heilt tomt.

På ein humoristisk og underfundig måte formidlar forfattar og illustratør Kari Stai kvardagslege situasjonar også små barn kan kjenne seg igjen i. Boka eignar seg svært godt til høgtlesing. I tillegg inviterer forteljinga til samtalar kring tre av dei verkeleg store spørsmåla i livet: vennskap, forsoning og ikkje minst jul.
Les meir

Robert Muchamore: Monsterbølgja

Robert Muchamore set punktum for Cherub-serien med den tolvte boka, Monsterbølgja. Handlinga er lagd til ei tropeøy, der ein tsunami har ført til store øydeleggingar. Dermed sender guvernøren på øya inn bulldosarar for å jamne landsbyane med jorda og erstatte dei med luksushotell.

James får i oppdrag å vakte familien til den korrupte guvernøren, eit oppdrag han ikkje tykkjer noko om. Samstundes pønskar tidlegare agentkollega Kyle Blueman ut sin eigen uoffisielle og svært farlege plan.

James må no velje mellom lojaliteten til CHERUB og lojaliteten til den eldste venen sin. Les meir

Max Velthuijs: Den store boka om frosken og vennene

Omsett av Hanna Midtbø og Halldis Moren Vesaas

Det er tretti år sidan dei første forteljingane om frosken, og kva er vel betre enn å samle seks av bøkene i ei jubileumsutgåve? I Den store boka om frosken og vennene finn du desse forteljingane:

Les meir

Christian Wiik Gjerde: Jul på Bukken hotell

I Blomholmen by snør det lett 1. desember, men det er likevel ikkje det spor julestemning i byen, synest Fredrik. Han er heime på juleferie frå kostskulen i Sveits, men det viser seg at dei ikkje kan bu heime på mange månader. No er han og foreldra på veg til eit hotell, der dei skal bu medan det er folk i huset deira som ordnar opp i vasslekkasjen og museinvasjonen. På veg til hotellet opnar Fredrik ein konvolutt som er adressert til far hans, ordførar Hanzon. Ein mystisk medalje ramlar ut. Avsendaren er ein som kallar seg Krampus, men Fredrik har ei kjensle av at det ikkje nødvendigvis er eit godt teikn å få ein medalje frå han. Dessutan er ikkje foreldra til Fredrik særleg hyggelege, og han mistenkjer at den manglande julestemninga har noko med ordførarpappaen hans å gjere.

Les meir

Lin Hallberg og Jonna Björnstjerna: Den magiske dyrebutikken – Ein venn til Leo

Til nynorsk ved Øystein Rosse.

Leo har mykje energi, så mykje at han knapt klarer å sitje stille, men er høgt og lågt heile tida. Dei andre i klassen synest det er travelt. Leo skulle så gjerne hatt ein venn, men kven skulle det vere? Ein dag han tek att Mira på skulevegen, fortel ho om Den magiske dyrebutikken. Sjølv fekk ho «Gullet», den hemmelege vennen sin, der. I Den magiske dyrebutikken er det den gamle dama som styrer, og ho veit akkurat kva slags dyr som passar for Leo. Ho gir han også ei liste med alt eit dyr treng for å trivast. Skal tru om Leo klarer å ta seg av den nye vennen sin, han som har så mykje energi, og som ikkje klarer å lese kva som står på lista frå den gamle dama?

Den magiske dyrebutikken – Ein venn til Leo er ei bok om vennskap og kjæledyr, og om å jobbe for noko ein vil veldig mykje. Illustrasjonane og teksten spelar godt på lag i denne humoristiske og hjartevarme forteljinga.

Ina Giske: Sjøhesten Hippo og plasten i havet

Illustrert av Børge Sandnes
Sjøhesten Hippo blir send på ei ufrivillig reise ut i havet. Der møter han ulike skapningar som alle er påverka av plast. Dette er ei historie om samarbeid og venskap på tvers av art, men mest om utfordringane plasten i havet skaper for dei som bur der.

Denne boka eignar seg godt til høgtlesing. Undervegs kan ein stoppe opp og spørje barna om dei kan namnet på ulike skapningar som bur i havet. Barna kan også kjenne igjen ulike gjenstandar frå menneske, som hamnar i havet, alt ifrå Q-tips til gamle fiskegarn/spøkelsesgarn.

Sjøhesten Hippo og plasten i havet inneheld også ein faktadel for dei som vil vite meir. Der finn du mellom anna spørsmål frå historia, ordforklaringar og informasjon om kva du kan gjere sjølv.
Boka forklarer utfordringane med plast i havet ein lettfatteleg måte.