Skribentarkiv: Anne Marta Vinsrygg Vadstein

Line Dybedal og Line Renslebråten: Eit hjarte til jul

Mamma til Nora ligg på sjukehuset og ventar. Ho må få eit nytt hjarte for å bli frisk og igjen kunne løfte og svinge rundt på Nora. I tillegg er det snart jul. Pappa og farmor prøver å gjere vanlege og kjekke ting i lag med Nora, slik at ikkje alt skal vere så rart og annleis i år. Likevel er det mykje å tenkje på medan dei ventar på telefonen frå sjukehuset om at eit nytt hjarte er på veg. Kva om mamma sine kjensler for Nora sit i hjartet? Kva skjer då når ho får eit nytt eitt?

Les meir

Olla Rypdal: Mysteriet ved Hangmanʼs Hill

Som tittelen tyder på, er dette ei spennande forteljing med røter i England. Vi får møte Anna og vennene Siri og Erik, som hjelper til med opprydding i det gamle feriehuset på Vargholmen. Der finn dei eit uskarpt, gammalt svart-kvittfotografi av eit landskap, eit stup ved ei klippe. Bak på biletet står det Hangmanʼs Hill, og dei vert nysgjerrige på å finne ut meir om staden og bakgrunnen for biletet. Saman med fotografiet finn dei også gamle brev, adresserte til ei Martha, underteikna Betsy. Breva er sende frå Combe Martin i 1906, og dei skjønar raskt at det handlar om eit gammalt, uløyst mysterium. Dei tre går i gang med å grave i historia og får verkeleg fart i sakene då foreldra til Anna går med på å reise til England på vinterferie, og Siri og Erik får bli med. Les meir

Vegard Markhus: Kunst og hærverk

Rine og Ravi vil lage noko fint i kunst og handverk-timen. Men Lærar-Knut har som vanleg andre planar. Han vil heller at dei skal ha kunst og hærverk. Kunst skal vere stygg, folk skal seie huff! meiner han. Han tek med elevane og ein boks med tusjar bort til den kvite, blanke bilen på parkeringsplassen og set i gang. Kva skjer når gymlærar Gyda oppdagar dei? Les meir

Anna R. Folkestad: Byggebøll

Dette er den fjerde boka om Besta og Bo, men alle bøkene kan lesast uavhengig av kvarandre. I Byggebøll møter vi først Besten og Bo, som byggjer hytte saman. Dei brukar hammar og spikar, og hytta blir rett så solid. Så kjem Besta, som vanleg full av idéar. Ho går i gang med å byggje ei hytte oppe i treet, for ho meiner det er mykje betre. Besta synest også det er mykje betre å bruke teip enn hammar og spikar i bygginga. «Er Besta si hytte trygg, spør Bo. Nei, seier Besten». Dei veit begge at det er ikkje råd å stoppe Besta når ho først er i gang. Men så byrjar det å blåse.

Byggebøll er ei forteljing som er lett å lese, spennande og humoristisk. Anna R. Folkestad står bak både teksten og dei herlege illustrasjonane, og kanskje er det nettopp derfor at ho får sagt så mykje med så få ord. For barn som held på å lære å lese, er det viktig at tekstane er slik at dei har lyst å lese vidare for å sjå kva som skjer, og dette er nettopp ei slik bok.

Boka er på nivå 1 i Leseland-serien til Samlaget.

Tetiana Kosovska: I skogen

I skrivande stund er det april, og medan snøen ligg tjukk somme stader i landet, har vårsola vekt både blomstrar og biller andre stader. Då er det spennande å lette på steinar og sjå under gammalt lauv, og kanskje er det liv i maurtua att? I skogen er ei vrimlebok med handteikna, detaljrike illustrasjonar. Her er det mykje å snakke om på kvart oppslag. Figurane går att fleire stader, og det gjer at lesaren blir kjend med dei. Vi får sjå morosame møte og dikte fantasifulle forteljingar sjølv, sidan boka er heilt utan tekst. Boka har kartongblad og passar like godt i tursekken som i lesekroken i barnehagen.
Les meir

Kari Stai: Passe happy

Kari Stai har fanga essensen i det å vere heilt i starten på puberteten og prøve å finne ut av kven ein er, og kva plass ein har i samfunnet og livet. Passe happy handlar om Juri, som synest Sofi er så fin at han mistar pusten. Han er usikker på seg sjølv, og i alle fall heilt blank når det kjem til forelsking og kyssing, tenkjer han. Det er berre saman med venninna Evy at han kan vere seg sjølv. Dei går i same klasse dei også, men er nesten som søsken. Det er komen ein ny gut til klassen, Hugo, som har budd i New York og er kul og trygg, nett som Juri skulle ønskje at han var. Og midt opp i alle desse vennegreiene må Juri finne ut av korleis han skal takle at pappa har flytta ut heimanfrå. Juri likar best at alt er som det alltid har vore, men no er både han og alt anna i endring. Samstundes skjer det også fine ting i livet hans, og sjølv om ytterpunkta i kjenslene ligg langt frå kvarandre, ønskjer han stort sett berre å vere sånn passe happy.

Les meir

Martine Grande: Ørn

Sam er ein forsiktig gut som likar aller best å vere i lag med den gule undulaten sin, Ørn. Heime kjenner han seg trygg, og saman med Ørn er det aldri kjedeleg å vere inne. Når pappa seier han må gå ut og leike med dei andre ungane, snik Sam seg inn igjen. Ikkje berre for å vere i lag med Ørn, men også fordi Gorm og dei andre ikkje er særleg snille. Ein dag ser Sam ut vindauget og får auge på ei jente han ikkje har sett før. Han blir varm i hjartet av henne, og slett ikkje redd, som han brukar å bli når han ser Gorm. Men plutseleg flyg Ørn ut vindauget, og Sam må ut og leite.

Les meir

Olla Rypdal: Klokkemakar Alfreds mysterium

Illustrert av Tarjei Rypdal Eide

Bakpå denne boka har forfattaren skrive at boka rettar seg mot 8–12-åringar, men at ho høver for alle generasjonar som set pris på ei god historie. Det er ei treffande skildring, for det er ei god historie, med røter attende til klokkemakaren til franske dronning Marie-Antoinette på 1700-talet. Den franske klokkemakaren laga ein gong to klokker som skulle høyre saman. Ved eit skjebnesamantreff kom klokkene attende til klokkemakaren etter at dronninga døydde, og dei vart verande i klokkemakarslekta sidan det. Lesaren får høyre denne historia gjennom ei forteljing i notid, om Tobias og Rosie, på vinterferiebesøk hos tante Lea. Dei vert kjende med klokkemakaren Alfred, som bur åleine på ein falleferdig gard i skogkanten. Han har vore på leiting etter dei to klokkene frå Frankrike heile livet, og no gjer Tobias og Rosie det dei kan for å hjelpe han å finne dei.

Les meir

Svein Jarle Åbrekk: Granittgutta – Dronemysteriet

Illustrasjonar: Trond Kulterud

Kameratane Frank og Kristoffer bur i Granittvegen, den minst actionfylte gata i heile Kramsvik, seiest det. Dei to har vore venner alltid, er nesten naboar, og elskar å spele data. Mellom husa til Frank og Kristoffer bur gamle fru Syvertsen, og ein dag blir ho fråstolen noko verdifullt. Dei to gutane har lagt merke til fleire uvanlege ting i gata, og startar å nøste i dei lause trådane. Kven kan stå bak tjuveriet, og kvifor?

Les meir

Bokbussen

Bokbussen RAUD, Bokbussen LILLA, Bokbussen BLÅ, Bokbussen GRØN, Bokbussen FAKTA, Bokbussen FAKTA nr. 2 og Bokbussen SPENNING. GAN Aschehoug Målgruppe 1.–4. trinn

Sju bussar med småbøker

BOKBUSSEN inneheld til saman 160 nyskrivne småbøker til støtte i leseopplæringa. Bøkene vert leverte i solide øskjer med lok: Bokbussen RAUD, Bokbussen LILLA, Bokbussen BLÅ, Bokbussen GRØN, Bokbussen FAKTA, Bokbussen FAKTA nr. 2 og Bokbussen SPENNING. Desse er fine å ha på klasserommet, som eit lite bibliotek i seg sjølv.

Les meir