Skribentarkiv: Anne Marta Vinsrygg Vadstein

Jan-Magnus Bruheim: Trollguten og andre dikt

Jan-Magnus Bruheim var gjennom heile diktarlivet oppteken av å skrive for born. Trollguten er ei samling barnedikt utgjeven i samarbeid mellom Samlaget og Vennelaget Jan-Magnus Bruheim. Dikta er frå 1956–1986 og spenner vidt tematisk. Her er dikt om det å vere barn, om dyr og natur, om troll og skrømt og mykje meir.

Jens Kristensen har illustrert samlinga med ei rekkje draumeaktige, vakre og fantasifulle teikningar som gjer dikta fine å lese og undre seg over saman med born i barnehagen eller skulen. Les dikta som dei står og utforsk nye (gamle) ord og formuleringar i lag etterpå.

Gyrid Axe Øvsteng og Per Ragnar Møkleby: Mørkt

Du kjenner det allereie når du får boka i hendene og fingrane stryk over det fløyelsmjuke omslaget: Om du let att auga, kjennest boka til og med nattsvart ut. Midt i alt det mørke står Dag og kjenner seg så liten. Han er nemleg mørkredd. Om dagen er Dag trygg og glad, spelar fotball og har det heilt fint, men når natta kjem, kjem også dei skumle tankane. I det siste har til og med mørkeret byrja å bråke, og det kjennest som om mørkeret kjem nærare for kvar kveld.

Les meir

Liv Oddrun Larsen og Henning Lystad: Hjartekrigen

Leseland, nivå tre

Vilde er forelska i Jakob, men det er det berre Synne som veit om. Jakob er den kjekkaste guten på skulen, og han sit i elevrådet saman med Vilde. Hege er leiar for elevrådet, og ho er ein skikkeleg jentemagnet. Superpopulær og alltid med ein rask replikk på lur. Saman med Hege føler Vilde at ho vert stum og stiv som ein mumie. Og no seier Bjørnar at Hege også er forelska i Jakob – det er ikkje til å halde ut.

Hjartekrigen tek ung forelsking på alvor, men handlar også om vennskap, bollekrig og uventa handsrekningar.

Passar best for elevar frå 4. trinn.

Anita Stokke Blomvik: Kvardagsmat

Kvardagsmat inneheld oppskrifter frå matbloggen kvardagsmat.no og eignar seg svært godt både for røynde og ikkje-røynde kokkar. Blomvik vender seg til familiar i tidsklemma og fortel si eiga historie om å gå frå posemat til å bruke ferske råvarer. Ho fortel at det ikkje alltid tek meir tid å lage mat frå botnen av, og at det handlar mykje om vanen. Gode vanar startar gjerne tidleg: Kokeboka inneheld mange oppskrifter som med fordel kan brukast på skulekjøkenet eller på studenthybelen.

Les meir

Kurt Rutledal: Alfred Bamse bæsjar

Kurt Rutledal har skrive fire bøker om Alfred Bamse og om det dei to finn ut i lag. Denne boka handlar om det som skjer i fordøyelsen, det som hamnar i do, og ferda vidare til septiktanken, septikbilen, reinseanlegget og vidare.

Alfred Bamse er skikkeleg nysgjerring på kvar det blir av det som vi spyler ned i do, og går forskingsmessig til verks for å finne det ut. Saman med Kurt reiser han rundt til eit anlegg som gjer kloakken om til hygienisert organisk kompost. Dei fer også til eit stort reinseanlegg i Bergen som lagar gjødsel til kornåkrar og til å plante plen og busker i. I tillegg får vi lære om biogass som driv bussar og ymse ting i industrien.

Les meir

Irene Ahnéll og Elisabeth Moseng: Pling vaken

Har du opplevd å leggje deg utan å få sove? Eller kjenner du deg igjen i å skulle leggje born som slett ikkje er trøytte, og som treng både ekstra vatn, ein ekstra runde på do og å høyre minst ein ekstra god-natt-song før dei sovnar?

Klara har det slik denne kvelden. Ho er rett og slett pling vaken, same kva mor gjer eller seier. Og det blir ikkje enklare når skapmonsteret kjem fram og klagar over at ikkje han heller får til å sove, og at han er redd for spøkelset under senga. Klara må gjere alt ho kan for å roe skapmonsteret og få det til å sovne. Ho har lært nokre overtalande argument frå mamma, men er det nok?

Les meir

Randi Fuglehaug og Nora Brech: Skalla

Iben likar ikkje å vere på sjukehus, men veit at ho må dit likevel for å få livsviktig behandling. Rett etter at dei har funne rommet dei skal sove på, står det ei jente i døropninga, utan eit hår på hovudet. Jenta presenterer seg som Skalla-Malla, og tek Iben med på oppdagingsferd rundt på sjukehuset. Saman gløymer dei alt som er vanskeleg og leitt, og dreg til hemmelege og magiske rom.

Iben mister venninna si, så boka romantiserer ikkje det å vere alvorleg sjuk. Likevel er det livsglede og livskraft som er grunntonen i forteljinga.

Skalla gjer det mogleg å snakke om eit vanskeleg tema, men det er også ei bok som inviterer til å leike seg med tanken på at det finst godteriblomstrar, diskodans og vennskap der du kanskje minst ventar det. Les meir

Bjørn Sortland og Elisabeth Moseng: Zara og dei. Misse-konkurransen

Du har kanskje tenkt at missekonkurransar for og med born er ein uting? Å fjonge seg med fine kjolar, sminke og hårpynt og bli bedømt av ein dommar har i alle fall mor til Zara ingenting til overs for. Ho meiner at kvar ei jente er den finaste og beste jenta. Far til Patrìcia synest derimot at ein missekonkurranse er heilt innanfor, og inviterer far til Zara til å vere meddommar. Men så er ikkje dette ein missekonkurranse som alle andre missekonkurransar heller, skal det vise seg. Dette er ein ny variant som garantert får fram eit smil og eit grøss både hos store og små lesarar, også hos mor til Zara.

Dette er den andre boka om Zara og dei, og også denne gongen får vi vennskap, naseblod og akkurat passeleg mykje spenning.

Kari Stai: Jakob og Neikob og Alle Andre

Etter å ha følgt bestevennene som bur i lag på ein bakketopp, gjennom bollebaking, i krokodillemagen, på sambuarleiting og blitt kjent med den nye naboen deira, er det mange som er blitt glade i Jakob og Neikob. I den femte forteljinga får vi møte Masekob, som meiner at Neikob bør bli som Alle Andre.

– Neikob, er du lei deg?
– Nei, eg er lei MEG, svarer Neikob. – Eg vil bli som Alle Andre.
– Veit du kven Alle Andre er, da? spør Jakob.
– NEI. Blir du med og finn han?
– JA, svarer Jakob.

Les meir

Inngunn Røyset: Fiskelykke

Leseland. Nivå 4.
Illustrert av Line Halsnes

Jonas og Anna gjer seg klare til å fiske frå moloen, men Kvitpus er i vegen og Jonas skubbar han irritert vekk. Han er først letta då mor tek katten med seg til veterinæren; endeleg får han fiske i fred! Men då Anna fortel at ho ein gong hadde ein katt, som faren fekk avliva hos dyrlegen, vert Jonas lei seg og redd. Er det derfor mor har teke med seg Kvitpus til dyrlegen? Får han nokon gong sjå att katten sin?

Fiskelykke er ein del av Samlagets Leseland for barn som lærer å lese. Dette er gode historier med enkel tekst og sjarmerande illustrasjonar, skapte for å stimulere og inspirere ferske lesarar. Les meir