Dette er den sjette boka om Jakob og Neikob. Jakob og Neikob er framleis bestevenner som bur i lag på ein bakketopp. I Stormen møter vi også Spinnvill, ein energisk figur som driv ein fabrikk som kan lage alt mogleg. Spinnvill har fire hender, går på hjul og har det breiaste gliset du kan tenkje deg. Ho vil gjerne trykkje på alle knappane i fabrikken og lage alt mogleg på ein blunk!
Kategoriarkiv: 6–9
Anja Dahle Øverbye: Lykketanna
Seks år gamle Torbjørn skal byrja på skulen, og alle spør om han gler seg. Men det gjer han ikkje. Han vil helst ikkje slutta i barnehagen, og han gruar seg til å verta skulegut. Ein dag kjøper mor hans ei dinosaurtann til Torbjørn. Kan tanna vera ei lykketann, skal tru?
Forfattar og illustratør Anja Dahle Øverbye har tidlegare gjeve ut teikneseriar for vaksne. Når ho no skriv for born, er det i form av ei biletbok med teikneserieelement. Illustrasjonane er fargerike, detaljerte og særmerkte, og resultatet er ei fin og visuelt spanande forteljing om eit emne mange fem- og seksåringar kan kjenna seg att i.
Hildegunn Bjelland: Krabben Klara og konkylien
Forteljinga om krabben Klara og konkylien er ei fantasifull forteljing om eit viktig tema, plastforureining i havet.
Forteljinga vert presentert frå dyra sin ståstad, og vi møter krabben Klara som får eit viktig oppdrag. I historia møter Klara dessutan nye og mystiske dyr som du aldri har møtt før.
Krabben Klara og venen hennar, Seien, lever i eit undersjøisk kongerike på botnen av havet. Ein dag er venen hennar forsvunnen. Brått byrjar det å hende mystiske ting som gjer at Klara vert lokka langt bort frå huset sitt og ut i det ukjende. Kven er det som syng den magiske songen? Kor kjem dei underlege spøkelsesfiskane frå? Vil ho rekke å utføre det vanskelege oppdraget som ho etter kvart vert sendt ut på?
Boka passar bra for lesarar kring 7–8-årsalder.
Trude Tjensvold: Vil du ha katt?
Leseland, nivå to
Gro og Gunnar finn ein katt i ei kasse. Det heng ein lapp på: Vil du ha katt? Sjølv kan dei ikkje ha katt, sidan mor er så allergisk. Gro og Gunnar må finne ein annan heim til Rusken, og ringjer på til alle i blokka etter tur. Det er allereie mange kjæledyr i blokka deira, men det er ikkje alle som passar like godt saman med pusen. Finn dei ein heim til han til slutt?
Jo Salmson og Jimmy Wallin: Hjelp! Eit spøkelseshus
Leseland, nivå 3.
Tenk om du og klassen din skulle besøkje eit spøkelseshus, ete grøn gugge og høyre om ei skummel spøkelsesslekt. Tenk deg at du i tillegg er veldig redd for spøkelse. Då er det ikkje berre berre. Slik er det for hovudpersonen i denne forteljinga. Skal tru korleis dagen vert?
Lin Hallberg og Jonna Björnstjerna: Den magiske dyrebutikken – Ester lengtar
Leseland, nivå to.
Ester er ny i byen og kjenner ingen. Utanfor vindauget ser ho ein gut med ein hund, og kjenner at det hadde gjort alt betre om ho hadde hatt eit dyr å vere glad i. Ho finn vegen til Den magiske dyrebutikken. I butikken er det både papegøyar, blekksprut og ein antilope. Kva for eit dyr skal ho velje?
Ester lengtar er ei eventyrleg og magisk lita forteljing om det å få eit dyr.
Lars Mæhle og Monica Egeli: Gjett ordet med Lurivar. Første ord.
Leseland, nivå ein.
Kjenner du Lurivar? Han elskar ord og går gjerne på jakt etter nye ord og formuleringar. I denne boka får lesaren vere med på å leite etter eit ord som Lurivar tenkjer på. Mellom sprelske sprang og lure blikk gir Lurivar stikkord som kan setje lesaren på sporet av svaret.
Rakel Helmsdal, Kalle Güettler og Áslaug Jónsdóttir: Monsterbesøk og Monsterknipe
Omsetjing: Tove Bakke
Dei to nye bøkene om Veslemonster, Storemonster og den nye venen Raggmonster er parallelle historier som kan lesast kvar for seg.
I Monsterbesøk vil Storemonster leike med Veslemonster. Men Veslemonster kan ikkje, for Raggmonster er på besøk.
Veslemonster og eg skal ut og fiske, det gjer vi alltid om laurdagen.
– Kjem du, då? spør eg.
– Kor hen, svarer Veslemonster.
– Ut og fiskar, vel! seier eg.
– Nei, seier Veslemonster.
– Eg har ikkje tid. Ha det!
Storemonster tykkjer ikkje det er noko moro å leike åleine. Skal tru om dei kan leike saman alle tre? Monsterbesøk er ei bok om kor vanskeleg det er å vere tre.
Les meir
Mats Eldøen og Sindre Goksøyr: Viss eg hadde hale
Korleis ville det vore å ha øyre som ein elefant? Eller å ha hale som ein apekatt? Eller å vera tvikjønna som ein brunsnigel? Slike fabuleringar er utgangspunktet for denne leikne og originale faktaboka for born. Eldøen leikar seg med tanken på kva som kunne vore mogleg dersom han hadde hatt ulike eigenskapar som dyr har, og so visualiserer Goksøyr det på sprelsk og kroppsoverskridande vis. «Viss eg hadde hale som ein apekatt, kunne eg tørka meg i rumpa medan eg las teikneseriar på do», kan me lesa. Etterpå får me vita kva apekattar nyttar halen sin til.
Marianne Gretteberg Engedal: Pølsetjuven
Familien til Kjell er tjuvar, men Kjell har ikkje lyst til å stela ting frå folk. Det einaste han stel, er ting som ingen eig lenger. «Å plukke søppel er ikkje å stele, det er å rydde. Tjuvar ryddar då ikkje», seier mor hans oppgjeven. Det heile toppar seg når venen til Kjell, Pølse-Per, dreg på ferie. Då krev familien at Kjell skal vera med og stela frå huset til pølsefamilien. Men må Kjell vera ein tjuv, berre av di familien hans er tjuvar?