Kategoriarkiv: ungdomsbøker

Lars Erik Helgemo og Markus Pedersen: Udugelege heltar

Supersterke Chrissa kom i fengsel allereie som 5-åring. Etter at ho har vore 15 år i fengsel, tek Kacker ho imot på utsida. Han treng nemleg hjelp av Chrissa for å redde sola. På oppdraget får dei med seg iskalde Calvin som må ha på seg ei kuldeabsorberande drakt. Trekløveret møter på fleire hindringar undervegs i oppdraget. Universet er i kaos, heltane er udugelege, og planen for å redde alt finst ikkje eingong.

Udugelege heltar, Volum 1: Stiv kuling er ein actionfylt teikneserie for ungdom og vaksne. Lars Erik Helgemo har laga fantasifulle teikningar, og god variasjon i perspektiv og utsnitt skaper levande sider med fin flyt. Samspelet mellom teikningar og tekst fungerer godt, og dialogen til Markus Pedersen er full av humoristiske ordspel.

Udugelege heltar starta som ein teikneserie på nett i 2016, og no har dei altså kome med si første teikneseriebok.

Aina Basso: Dei dødsdømde

Ho sa ho var dronning, men dei trudde ikkje på ho. Skotsk-norske dronning Margrete døydde i 1289, berre sju år gamal. Ti år seinare dukka det opp ei kvinne med grått hår som påstod at ho var dronning Margrete og at ho hadde vore bortført. Mange trudde det var sant, men ikkje biskopen og styremaktene. Ho vart brend på bålet i 1301, som den første kvinna me veit om her i landet.

Dei dødsdømde fortel også historia om tenestejenta Sofie Johannesdotter. Først drap ho ei anna tenestejente med gift i teen. Tre år seinare forgifta ho husfrua, og året etter drap ho husbonden. Året etter prøvde ho på det same igjen, men offeret overlevde. No var mistanken så sterk at lika vart gravne opp att, og dei hadde framleis arsenikk i kroppen. 37 år gamle Sofie Johannesdotter vart halshogd i 1876, og ho er den siste kvinna i Noreg som vart avretta. Les meir

Ingunn Røyset: Perfekt

Perfekt er ein roman for 7.–10. trinnet. Her møter vi Pia med kallenamnet Peanøtt. Pia bur heime saman med far sin. Mora har flytta til Oslo for å arbeide som sekretær for ein minister på stortinget, og er sjeldan heime. Det er noko einsamt og sørgjeleg over heimen til Pia. Mor har reist for å få miljøbyte og karrierevekst, og Pia opplever faren som energilaus og fjern.

Pia ser seg ikkje som ein av dei kule og anerkjende på ungdomsskulen. Ho har kort hår og tannregulering. Ho opplever seg sjølv som lita og spinkel, usynleg og trist. På skulen blir ho stadig møtt med krenkingar både av jamaldringar og lærarar, og ho byrjar å slite med negative tankar og kjensler som ho ikkje klarer å kontrollere, og som gjer henne redd.   Les meir

Therese Garshol Syversen: Sting

16 år gamle Emma har opplevd noko av det vondaste og mest uforståelege nokon kan oppleve. Ein familietragedie, der Emma sin eigen far har skote både henne og mora, og Emma er den einaste overlevande. Vi følgjer Emma i tida etterpå, når ho må bu hos mormora si og ha samtaler med psykologen Beate for å prøve å kome seg vidare. Prøve å hugse akkurat kva som har skjedd. Men Emma vil ikkje hugse. Det er for vondt. Kan ho lage ein ny versjon som er lettare å halde ut?  

Lesaren får bli kjent med historia gjennom Emma sine auge, og kapitla i boka skiftar mellom «no» og «då». Ei tidsreise der eg-personen, Emma, ser tilbake på ting som skjedde før pappa brukte pistolen, og samtidig ser livet «her og no». Kunne Emma visst at dette kom til å skje? Var der teikn som ho oversåg? Beate har sagt at det ikkje er hennar feil, at det ikkje er noko Emma kunne ha gjort annleis. Men kva om det ikkje er sant? Ho blir stadig dregen mellom før og no. Det som var før, kjem til ho gjennom draumar, samtalar og minne, og plutselege hendingar, skifte, rørsler og lydar dreg ho tilbake til det som er no.  Les meir

Tor Arve Røssland: Vulkanen vaknar. Første bok i serien Overleve.

Jamal og Eira er begge 13 år. Dei har blitt med kvar sin far om bord på forskingsskipet Bluenose. Oppdraget er å finne ut kvar all fisken i nordatlantiske farvatn har tatt vegen. Det kan bli matkrise om dei ikkje finn fisken. Jamal er svært interessert i alt som går føre seg om bord, men det er ikkje Eira. Ho har ikkje lyst til å vere der i det heile, men faren har bestemt.

Hendingane strekker seg over 17 dagar, og dette er ei framtidsforteljing. Her får vanlege folk reise med fly berre ein gong i året, og flyplassen for Bergen er flytta til Voss. Dei store isane har smelta, og havstraumane går ikkje lenger der dei gjekk før. Like alvorleg er det at heile Nord- og Sør-Amerika er blitt eit diktatorisk land som heiter Americas. Her er det berre Canada som ikkje er med. Dei to store rådande nasjonane er Alliansen og Den Kinesiske Staten, og mellom dei er det fare for krig. Les meir

Lars Mæhle: Tusenfryd. Noveller

Tusenfryd er ein flott blomster, men Lars Mæhle viser at «Tusenfryd» også kan vere tittelen på ei nydeleg bok! Denne boka rørte meg allereie frå første side.

Boka har undertittelen «noveller», og ho inneheld historier om livet til seks gutar og jenter i ein tettstad i Noreg. Kvart kapittel gir lesaren innblikk i livet til dei ulike personane og viser at det gøymer seg meir i ein person enn det vi ser. Forteljingane heng saman med kvarandre og dannar ei heilskapleg forteljing om relasjonane og liva til elevane, borna, tenåringane og menneska i ein klasse. I det siste kapitelet, eller forteljinga, «juleevangeliet», er det ei spesiell setning som oppsummerer boka, og sjølve livet, så godt. Setninga «Alt vi ikkje veit om kvarandre …»

Og dette er heile essensen i boka. Kan det vere ein skjult grunn til at folk er som dei er, eller gjer som dei gjer? Les meir

Johannes Nymark: Barça. I kamp sidan 1899

«Alle veit i dag at toppfotballen er ein korrupt pengemaskin der stadig griskare eigarar inntar styreromma, medan ingen lokale heltar er igjen på laget som entrar banen».

Denne salven kjem frå Kjartan Fløgstad i føreordet til dokumentarboka om FC Barcelona, klubben som av mange blir rekna som verdas beste på totusentalet. Forfattaren er Johannes Nymark, spansklærar, forskar og fotballentusiast med eit livslangt kjærleiksforhold til klubben. Han kom til Barcelona som ung språkstudent i 1971, og kjøpte sitt første årskort på heimebana Camp Nou (som tyder Ny mark!) lenge før klubben og spelarane fekk verdsvid stjernestatus. Han har dermed ein heilt annan og breiare bakgrunn enn dagens talrike Barça-fans, som først og fremst er opptekne av spelarane og spelet på den grøne grasmatta. Les meir

Überpress: Overtrykk 2021

No er han her, den årlege teikneserieantologien frå Überpress! Sidan 2012 har forlaget kome med 16 antologiar der norske talent får lage teikneseriar. I år får lesarane åtte historier presentert. Nokre av skaparane har aldri laga eigne teikneseriar før, andre har erfaring frå området. Alt dette får vi vite mellom kvar historie, der skaparane av historiene fortel om bakgrunnen sin og prosessen rundt historia dei har laga. På omtalen bak på omslaget, kan ein lese at «i alle historiene i Overtrykk 2021 søkjer nokon etter noko, anten kjærleik, karriere eller gull og rikdom. Dei finn alle noko til slutt.»

Les meir

Atle Hansen: Alexander er forelska i Live

Jonas, Live, Alexander og Kevin er alle elevar på vidaregåande skole. Jonas og Live har vore veldig gode vener sidan dei var små. Alexander er ny på skolen og er forelska i Live. Live liker merksemda ho får frå han, men ho er forelska i Kevin. Jonas, som er eg-forteljaren, forstår slett  ikkje kva Live ser i Kevin.

Faren til Jonas er fotballtrenar, og Jonas har vore ein fotballgut, men treivst ikkje lenger saman med dei andre gutane. For faren hans er fotball det viktigaste i verda. Han fortel at dei har fått ein ny spelar på laget, Kevin. Han er ein god fotballspelar, men han har ord på seg for å vere ei bølle. Jonas går i staden på kunstfag på kulturskolen, og der er han einaste guten. Jonas lagar ei teikning av Alexander, og sender denne på snap til Live. Han får eit bilde av Kevin på fotballtrening tilbake. Les meir

Harald Nortun: Skallen. Grøss og gru-serien

Erik er forteljaren, han pakkar klede, sovepose og fiskestong og er klar for tur. Ben og han har begge sagt heime at dei skal til fjorden og fiske, men dei har tenkt seg til Reinsvatnet der dei tidlegare ikkje har fått lov til å dra. Ein grunn til det er at der er svært rasfarleg. Det finst ei gammal segn om at ein røvar har gøymt seg der og går igjen. Det er bratt og langt å gå dit, men dei finn ein utydeleg sti der det er lenge sidan nokon har gått.  Det er heller ikkje mobildekning ved Reinsvatnet.

Då Ben og Erik kjem fram, kjenner dei lukta av bål, men dei ser ingen røyk og ikkje folk. Dei fiskar og diskuterer slukar, men får ikkje napp. Så kjenner Erik bållukta på nytt, og han får ei kjensle av at nokon ser på dei. Så oppdagar dei at det har vore eit bål utanfor ei fjellhole. Dei finn ein knokkel som er like langt som lårbeinet til Ben, og uroa Erik kjenner, vil ikkje sleppe taket. Les meir