Kategoriarkiv: lydbøker

Desse bøkene er å få kjøpte/lånte som lydbøker.

Du kan òg sjå ei liste med lydbøker på nynorsk hjå Norsk lyd- og blindeskriftbibliotek.

Christian Wiik Gjerde og Ingunn Thon: Oppdrag Romvesen. (5 episodar)

Oppdrag Romvesen er ein digital/nedlastbar lydbokserie som er inndelt i episodar. Det er viktig å høyre episodane i rekkefølge slik at ein får gangen i historia. Serien består av 5 lydbøker/episodar, der kvar lydbok varer mellom 13 og 15 minutt. Den første episoden har fått namnet «Dei nye naboane», episode 2 heiter «Første skoledag», nummer 3 er «Akvariet», nummer 4 «Overnatting», og den femte heiter «Musikktimen». 

Det er forfattarane sjølve som les, og dei gjer det med stor innleving. Dei ulike karakterane i lydboka vert presenterte gjennom ulike dialekter og stemmer, og det vert gjort med stor overtyding. Lydboka er stappfull av lydeffektar og bakgrunnsmusikk, noko som gjer ho ekstra levande. Historia er spennande og morosam og passar for barnehagebarn og dei yngste elevane på skulen.   Les meir →

Ruth Lillegraven og Jens Kristensen: Klodeklubben 4: Julemysteriet

Julemysteriet er den fjerde boka i serien om Klodeklubben, eit detektivbyrå der tre gode vener løyser mystiske miljøsaker.  

Det nærmar seg julemarknad, og Vanja og faren har fått i oppdrag å skaffe julegrana som skal stå på torget. Saman har dei hogge den høgste og finaste julegrana i skogen. Aldri har det stått ei finare julegran på torget, og Vanja gler seg til å vise ho fram til venene Mo og Sivert. På julemarknaden er det mykje kjekt å sjå på i dei mange spennande buene, men høgdepunktet er likevel at nissen skal kome, og at julegrana skal tennast. Julegrana frå Vanja sin skog. Men på ein augneblink vert idyllen på julemarknaden snudd til kaos. Nokon har øydelagt julegrana! Den høge, fine grana ligg på bakken, oppdelt i mange bitar. Kven er det som har gjort dette? I tillegg er det noko rart med nissen. Kvifor har han ikkje reinsdyr med seg slik han brukar, og kvifor seier han ikkje at ungane må syngje før han deler ut gåver? Det er noko som ikkje stemmer! Vanja, Sivert og Mo er straks på saka, og saman følgjer dei spor i snøen, snakkar med ordføraren og legg ut på skitur for å kome seg opp til garden til Johannes Lia – den einaste i bygda som har reinsdyr. Er det klimaendringar som gjer at reinsdyra ikkje dukka opp på torget? Og er det ein samanheng mellom den øydelagde grana og den merkelege nissen, eller er dette to ulike saker?  Les meir →

Aslak Brimi og Agnetha Berg: Huldra Hildur

Forteljinga om huldra Hildur vert formidla gjennom bok, lydbok og barneplate av musikaren og forfattaren Aslak Brimi, illustratøren Agnetha Berg, songaren Mari Midtli, Mads Erik Odde på trekkspel, Pål Svindland på bass, fløyte og saksofon, og Espen Wensaas på cittern, gitar og fløyte, og songgruppa Fjelltite. Lydboka er lesen inn av Even Lusæter. Inspirasjonen er henta frå seter og fjelliv i Gudbrandsdalen, og kan ha nedslagsfelt både lokalt, nasjonalt og fleirkulturelt. Aktørane er trygge og engasjerte i formidlinga.

Les meir →

Antoine de Saint-Exupéry: Den vesle prinsen

Omsett til nynorsk av Jon Fosse

Det er berre med hjartet ein ser godt. Det viktigaste er usynleg for auga.

Antoine de Saint-Exupéry-klassikaren Le Petit Prince er med dette framifrå omsett til nynorsk av Jon Fosse. Med om lag 300 omsetjingar og 200 millionar selde eksemplar er den poetiske og filosofiske barneboka allalderlitteratur elska av både barn og vaksne i generasjonar verda over. Språket og illustrasjonane er naivistiske og med livsvisdom både i og mellom linjene.

Les meir →

Ruth Lillegraven og Jens Kristensen: Hytta som forsvann

Hytta som forsvann er andre bok i serien om Klodeklubben, eit detektivbyrå med klima- og miljøsaker som spesialitet.

På garden der Vanja bur, blir fleire av dyra sjuke. Samtidig skjer det noko med den tomme hytta i skogen, der Vanja og Sivert har leika. Kven er det som riv gamle hytter og byggjer nye? Og kvifor flyt søppelet rundt i naturen?

Les meir →

Ruth Lillegraven og Jens Kristensen: Dei svarte svanene


Opplegg til boka:
Bok på 1-2-3: Dei svarte svanene – tverrfagleg opplegg i norsk og naturfag.

Dei svarte svanene er første bok i serien om Klodeklubben, eit detektivbyrå med klima- og miljøsaker som spesialitet.

Ein båt krasjar i kaia utanfor fabrikken i den vesle bygda. Vanja, Sivert og Mo oppdagar oljesøl i fjorden, og dei kvite svanene er tilgrisa av svart olje. Kan det vere den rike fabrikkeigaren som kvittar seg med olja? Eller er den mystiske assistenten hans, Luke, innblanda? Når ingen vaksne trur på det dei fortel, må Klodeklubben ta saka i eigne hender.

Les meir →

Agnes Ravatn: Dei sju dørene

Dei sju dørene er både ei slektshistorie og ein roman om etterforskinga av ei forsvinning. Hovudpersonen er litteraturprofessor Nina Wisløff, som er trøytt av å undervise uinteresserte og uvitande studentar. Ho seier derfor i ein paneldebatt at litteraturvitarar burde arbeide i politiet, fordi dei er så gode til å fokusere på detaljar og gode til å finne samanhengar. Denne utsegna vekker merksemd, og det fører ho sjølvsagt inn i eigne undersøkingar då ei ung kvinne forsvinn.

Les meir →

Ane Barmen: Draumar betyr ingenting

Hovudpersonen Louise er 17 år og kjem frå ei lita bygd på Vestlandet nokre timars biltur frå Ålesund. Ho har nyleg mista ungdomsvenen og kjærasten sin, og flyttar til Ålesund for å gå på ny skule for å kome seg bort frå dei vonde minna. I boka er Louise heime igjen for å gå i gravferda til mormor. I gravferda kjem alle minna om Tormod tilbake.

Storesystera Isa tipsar om sommarjobb på sjukeheimen, og motstrevande går Louise dit på intervju. Ho får jobb på dagen, og er passeleg fornøgd med tipset til systera. På sjukeheimen blir ho kjend med Karen som ho av og til misunner fordi ho ikkje hugsar at besteveninna er død. Ho sjølv klarar ikkje å gje slepp på tapet etter Tormod, som døydde brått frå ho for halvtanna år sidan.

Les meir →

Linn T. Sunne: Mareritt

Opplegg til boka:
Nynorsksenteret.no:
Undervisingsopplegg til serien Grøss og gru.
Tid for ti: Undervisingsopplegg og aktivitetar til eit utdrag frå boka (s. 5–12)

Mareritt er den femte boka i Grøss og gru-serien. Her møter vi Mattias som går i niande klasse og Mia, søstera hans, som går i andre klasse. Dei har saman med mamma nettopp flytta til Smeby. Dei har ikkje budd der meir enn ei veke før Mattias vaknar av eit skrekkeleg mareritt, han høyrer ei jente som skrik.

Han står opp av senga og ser ut vindauget. Ved sida av dokkehuset ser han ei jente: «Ei ganske lita jente, med bustete hår. Det er som om ho gløder, som om det brenn i auga hennar.» Mattias skjønar med ein gong at denne jenta ikkje vil han vel, men det var då vel berre ein draum?

Les meir →

Terje Torkildsen: Isla Bonita

Endeleg skal det bli ein vanleg ferie på Carlo 16 år og mora hans! Dei kjem til San Pedro på øya Isla Bonita, ei oppdikta kanariøy. Det første Carlo legg merke til, er den dansande jenta i hamna, og han tenker at dette er noko anna enn heime i Haugesund. Det blir likevel ikkje slik Carlo hadde håpa: «Veit ikkje betre. Aner ikkje at denne vesle øya langt ute i Atlanterhavet vil forandra livet hans for alltid. Om fem dagar vil alt vera annleis».

Les meir →