Überkrig er den tiande teikneserieantologien frå forlaget Überpress. Denne gongen tek serieskaparane føre seg temaet krig, og to av historiene er på nynorsk. Innfallsvinklane i dei ulike seriane er ulike – krigen vert nytta både som ramme, bakteppe og metafor her – og særleg den 16 sider lange opningsforteljinga «Freden» av Jey Levang gjer inntrykk.
Kategoriarkiv: spenningsbøker
Magnhild Bruheim: Bjørnemysteriet
I denne tredje spanande krimforteljinga om Stian og Stine hender det fleire ran og innbrot. Det rare er at gjerningsmennene har på seg dyrekostyme. Stian og Stine grip fatt i saka og byrjar etterforska saka på eiga hand. Slik viklar dei seg inn i fleire skumle situasjonar. Kven er ven og kven er skurk? Og kva er det eigenleg som føregår i nattemørket på garden Vistad?
Stine heldt pusten. Det eine dyret såg rett mot staden der dei stod. Det var som om den store ulven møtte blikket hennar, sjølv om ho heilt sikkert var usynleg der ho stod. Ho greip handa til Stian, berre for å vita sikkert at han var der. Saman måtte dei vera modige.
Ulven tok nokre steg nærmare.
Tor Arve Røssland: Glimt
Opplegg til boka:
Tid for ti: Undervisingsopplegg og aktivitetar til eit utdrag frå boka (s. 71–78)
Den nye grøssaren til Tor Arve Røssland har to tidsplan og to ulike historier, og kapitla i boka vekslar mellom dei to historiene.
Den eine av historiene handlar om foreldrelause Solveig som er 15 år og bur på Grovøy, ei øy i havgapet. Historia er lagd til vårdagane 1940, krigen har nett starta og tyskarane kjem til Grovøy. Dei okkuperer huset ho bur i, og Solveig blir tenestejente i sin eigen heim. Ho får lange og tunge arbeidsdagar, og misliker løytnant Steiner som ofte er på besøk og stirer på ho. Men ho liker Torbjørn … Etter kvart blir det svært vanskeleg for Solveig, fordi folk på øya mistenker at ho er på sida til tyskarane.
Ingunn Røyset: Aldri fred å få
Den første boka om Dagny, Dei et ikkje sjokoladepålegg i krigen, har no fått eit framhald. Det er bra, for vi var mange som var spente på korleis det skulle gå med Dagny og bestevenninna Belinda, med Kalla, Perry og Guldis og alle dei andre dei siste åra av andre verdskrigen. I den frittståande oppfølgjaren Aldri fred å få får vi mange svar, og vi får også bli med på den store feiringa då krigen tok slutt.
Boka vekslar mellom å fortelje historia til Dagny i notid og Dagny på mormor si tid. Dette er eit snedig, men vellukka grep for at lesaren skal leve med i begge tidsperiodane. I notid har Dagny blitt storesøster til ein liten gut. Veslebror skrik mykje, og foreldra er veldig opptekne med han. I tillegg har mor til Dagny det travelt med å følgje opp ei sak ho brenn for; å stoppe etableringa av oppdrettsanlegg i nærmiljøet. Det er endå godt at mormor har tid til Dagny. Tid og sjokolade i skuffa.
Asbjørn Rydland: Fredlaus
Med Fredlaus har Asbjørn Rydland skrive det femte og siste kapittelet i serien om Drakeguten. Hovudpersonen, Koll frå Kervad, har utvikla seg på mange vis gjennom dei fem bøkene. Han er no sterkare og meir vaksen, men med større kraft kjem òg større dilemma – og av og til kjem han opp i situasjonar der det vert gale, same kva han vel å gjera.
Smeddottera Faria speler òg ei viktig rolle i denne forteljinga, og nokre kapittel er skrivne frå hennar synsvinkel.
Rydland skriv godt, handlinga er spanande, fiksjonsuniverset han skildrar er stort, komplekst og levande, og heile serien høgst tilrådd.
Magnhild Bruheim: Hyttemysteriet
I denne andre boka i spenningsserien om Stian og Stine oppsøkjer Stian ei gammal, forfallen hytte i skogen. Ein gong skjedde det eit mord i hytta, eit mord som ikkje vart oppklara. Det er noko mystisk med hytta, og saman med Stine bestemmer Stian seg for å finne ut kva det er. Kven er mannen som ser ut til å bu der? Har han noko med drapet å gjere?
Det er meir enn mysteriet som må jobbast med. Dei to stesøskena har nettopp blitt ein del av ein ny familie, og det er ein del som skal gå seg til. Mor til Stine ønskjer at dei skal ha kvalitetstid i lag heile familien, men det er ikkje berre enkelt å få alle til å prioritere pizzakveldar i heimen når det er så mykje anna som lokkar, både for storesøstra Malin og dei to unge detektivane. Dessutan likar Stine å vere saman med Julie og Ida, og då er det ikkje lett å få tid til både detektivarbeid og kvardagsliv. Når ho i tillegg tek til å få fine meldingar frå Markus i klassen, får ho enno fleire tankar i hovudet.
Lene Kaaberbøl: Villheks – Atterkomaren
Til norsk ved Øystein Rosse
No har den sjette og siste boka i Villheks-serien kome på norsk, og med det er den spanande bokserien om den unge villheksa Clara komplett. Kaaberbøl er flink til å skriva engasjerande og med stort driv, og det tek ikkje mange linene før me er midt i dramatikken.
Handlinga i boka heng tett saman med handlinga i bok fire (Blodsungen) og bok fem (Fiendeblod), og lesarane får truleg størst utbytte dersom dei les dei tre bøkene i samanheng. Med andre ord: Låner du med deg bok fire til ferieturen, so gjer du lurt i å låna bok fem og seks med det same.
Atle Hansen: Svartedalen
Det er sommarferie. Alle dei andre ungdommane har reist til Syden eller andre spennande stader. Hovudpersonen vår er på sommarferie i Kapteinshuset saman med foreldra sine. Kan det verte kjedelegare? Her er det ingen jamaldringar å vere saman med. Han gler seg faktisk til å byrje på skulen att.
Slik startar forteljinga om mysteriet i Svartedalen. Hovudpersonen er ein gut i ungdomsskulealder. Han får høyre historia knytt til Kapteinshuset, dette staselege huset som vart bygd av den rike Kapteinen, og som far hans no har arva. Historia fortel også at Kapteinen vart teken av dage i Svartedalen. Han tek til å lure på kva som eigentleg er med Svartedalen. Kvifor er det ingen som går dit?
Lars Mæhle: Bouvetøya 2052
Klima-thriller lagt til framtida.
Året er 2052. Startskotet går for tidenes heftigaste nett-reality, ein klimakonkurranse på isolerte Bouvetøya i Sørishavet.
Ein ungdom frå kvar verdsdel, kvar med sine unike eigenskapar, skal knive om enorme pengesummar. Dei skal vere offline i tre dagar, mens resten av verda kan følgje dei gjennom liveoverføringar. Men er Bouvetøya 2052 verkeleg ein sjanse til å endre planetens framtid? Mot si vilje blir den norske aktivisten Roland vikla inn i eit spel på liv og død.
Les meir
Magnhild Bruheim: Motorsykkelmysteriet
Opplegg til boka:
Tid for ti: Undervisingsopplegg og aktivitetar til eit utdrag frå boka (s. 7–17)
– Stian og Stine. Namna passar saman. Vi kunne vore tvillingar. Kanskje mange trur vi er det. Stine såg prøvande bort på Stian.
Slik startar den første boka i spenningsserien om Stian og Stine. Begge er 12 år gamle og bur i det same huset, fordi mor til Stine og far til Stian er kjærastar og har flytta saman. Den nye familien skal lære seg å leve saman, og det er ikkje alltid like lett. Stine vil gjerne at også storesøstera til Stian, Malin, skal like henne. Stine synest ikkje det er lett å bli klok på henne, og lurer på kvifor Malin er så sur.
Ein kveld skjer det noko mystisk og farleg i nabolaget: Ein gut vert påkøyrd av ein motorsyklist. Stian og Stine oppdagar at begge likar å løyse mysterium, og tek saka. Dei neste dagane får dei oppleve meir spenning enn godt er, og vennskapen deira vert utfordra.